Kërkohet mobilizim i të gjitha instancave për parandalimin e zjarreve

Viti – Drejtoria e Shërbimeve Publike dhe Emergjencë, ka mbajtur sot një takim që kishte për qëllim koordinimin e aktiviteteve mes institucioneve komunale, policisë së Kosovës, këshillave të fshatrave dhe qendrës rajonale të alarmit, për ndëshkimin e shkelësve të ligjit, lidhur me zjarret dhe shkaktimin e rreziqeve tjera të qëllimshme.

Drejtori i Shërbimeve Publike Nexhmedin Jakupi, duke përmendur disa nga pikat kyçe sa i përket vetëdijesimit të qytetarëve dhe metodave që duhet ndërmarrë në parandalimin e zjarreve, është fokusuar edhe në minimizimin e shpenzimeve, si dhe bashkëveprimin e të gjitha instancave për të ndaluar zjarrëvëniet e qëllimshme.

Hetem Jakupi udhëheqës i Njësisë së Zjarrfikësve në Viti, ka paraqitur raportin e punës dhe ka bërë krahasimin intervenimeve të vitit të kaluar me atë të këtij viti. Sipas këtij raporti, gjatë vitit 2015 njësia e zjarrfikësve në Viti ka të regjistruar 377 dalje, ku përfshihen gjitha intervenimet si nga zjarri, vërshimet, aksidentet etj. “Nga numri i përgjithshëm i intervenimeve, 58 % e këtyre janë nga zjarri, që do të thotë se kemi pasur 217 raste të zjarrit gjatë tërë vitit të kaluar. Gjatë periudhës 6 mujore të këtij viti kemi 86 raste, por sezoni me rrezikshmëri nga zjarret është tani në muajt vijues”, ka thënë Jakupi.

Në këtë takim, ishin të pranishëm edhe Nijazi Miftari zyrtar për rrezikshmëri të lartë i cili njoftoi për strategjinë e rreziqeve nga zjarri, të hartuar nga Qeveria e Kosovës.

Ndërsa Sali Mustafa nga zyra rajonale e alarmit, u raportua për rastet e raportuara në këtë zyrë dhe shqetësimet për alarme të rrejshme që po ndikojnë negativisht ne efikasitetin e kësaj zyre./rajonipress/