Në vetmi ka mbetë Tugjeci

Po knon qyqja, knon turreci – Në vetmi ka mbetë Tugjeci !
Në mahallën Kurt Krasniqi – Nuk ka mbetë ma kurrkush hiqi !

Po knon qyqja në zabel –
Ku na mbet Baci Zenel ,
Që s’po i bien ma kund kavallit ,
Se mu dogj zemra prej mallit ?!

Po knon qyqja n’ kodër te Hani –
Ku na mbet Shefkia e Shabani ,
Që s’ knojnë kangën e “Sen Rugovës “,
N’ rresht me krushq përpara lodrës ?!

Po knon qyqja te Kapia –
Ku na mbeti bacë Hamdija ,
Që s’po i ndihet çiftelia ,
As mezhnica te sheftelia ?!

Po knon qyqja te kulumbria –
Ku na mbeti bacë Sadria ,
Që s’ po i ndihet kurrkund fyelli ,
Në qetësi ka ra krejt pylli ?!

Po knon qyqja n’ maje t’ shkamit –
Ku mbet oda e bacë Bajramit ,
Që ka pritë burra e trima ,
Ulë kamëkryq n’ jana e qilima ?!

Po knon qyqja n’ fërk t’ sabahut –
Ku mbet oda e bacë Avdullahut ,
Që i ka rritë do djem petrita ,
Sikur Dielli që lëshon drita ?!

Po knon qyqja n’ degë të plepit –
Ku mbet oda e bacë Mehmetit ,
Me derë hapur e sofra t’ bukës ,
Për shokë, miq e burra t’ pushkës ?!

Po knon qyqja n’ za prej mallit –
Ku mbet oda e bacë Bilallit ,
Që u dha bukë burrave t’ Malësisë ,
Por këto vatra i kanë braktisë ?!

Po knon qyqja n’ degë të blinit –
Ku mbet oda e bacë Brahimit ,
Oda e dasmave , oda e gëzimit ,
Odë kuvendi e burrërimit ?!

Po knon qyqja , haj medet –
Shpi e troje mbeten shkret ,
Nuk ke kujt ma n’ derë t’i thërret ,
S’ ka njeri që del të pret ?!…/rajonipress/

Gjilan, më 12.06.2016 . Demir Krasniqi