Bashkëpunimi me Luginën është jetik për shqiptarët në përgjithësi

Gjilan – Komiteti për Bashkëpunim Ndërkufitar (KBN) në Gjilan, ka mbajtur të martën një debat me përfaqësues të institucioneve lokale nga komunat Preshevë e Bujanoc, ku është biseduar për bashkëpunimin ndërkufitar në nivel komunash, veçmas Gjilanit, Preshevës e Bujanocit, si dhe nevojën për shtrirjen e këtij bashkëpunimi në një rrafsh më të gjerë, duke përfshirë edhe komunat e banuara me shqiptarë përgjatë brezit kufitar në Maqedoni.

Kjo iniciativë është mirëpritur nga pjesëmarrësit, ndërkohë që janë diskutuar edhe çështje të tjera që ndërlidhen me aspekte të sigurisë, avancimin e mëtejmë të arsimit, në përgjithësi, si dhe aspekte nga fusha e kulturës e shumë të tjera.

Në këtë debat me përfaqësues të institucioneve shqiptare nga Lugina e Preshevës, të organizuar nga Komiteti për Bashkëpunim Ndërkufitar në Gjilan, janë shprehur pakënaqësi me rezultatet e bashkëpunimit në nivel kombëtar.

Pjesëmarrësit kanë trajtuar çështje të shumta që ndërlidhen me aspekte të përgjithshme të bashkëpunimit të komunave Preshevë, Bujanoc e Medvegjë me institucionet shqiptare në Tiranë, Prishtinë, Shkup e Ulqin.

Kushtrim Kadriu, kryesues i Komitetit për Bashkëpunim Ndërkufitar, ka ngritur iniciativën për themelimin e këtij komisioni, ndërkohë që ka theksuar gatishmërinë për bashkëpunim mes këtyre komunave të brezit kufitar.

Kurse, deputeti i vetëm shqiptar në Parlamentin e Serbisë, Fatmir Hasani, ka vënë në spikamë rëndësinë e formimit të një trupe të përbashkët të institucioneve relevante të qendrave kryesore të hapësirës kombëtare, si Tiranë, Prishtinë, Shkup e Ulqin, me përfaqësim të përhershëm edhe nga shqiptarët e Luginës së Preshevës.

Debatin e sotëm në Gjilan, ai e ka cilësuar me rëndësi të veçantë për avancimin e mëtejmë të shumë çështjeve.

Hasani ka thënë se bashkëpunimi me Gjilanin dhe Kamenicën, është jetik për shqiptarët në përgjithësi, veçmas për ata nga Lugina e Preshevës, duke nënvizuar nevojën e nxjerrjes së efekteve nga kjo iniciativë, drejt një bashkëpunim më të madh në të ardhmen.
Bashkëpunimin e ka mbështetur edhe nënkryetari i Komunës së Preshevës, Xhelal Mehmeti. Ai ka theksuar se një iniciativë e tillë për bashkëpunim rajonal është e nevojshme, madje sipas tij, edhe e vonuar.

Mehmeti ka folur edhe për shqyrtimin e mundësive për zgjerimin e këtij bashkëpunimi me komunat e banuara me popullatë shqiptare përgjatë brezit kufitar me Republikën e Maqedonisë.

Në fund Sami Azemi, anëtar i Komitetit për Bashkëpunim Ndërkufitar në Gjilan, pasi ka përshëndetur këtë nismë, të cilën e vlerësuar si shumë të rëndësishme, është shprehur i bindur se do të ketë edhe rezultate konkrete.

Ai ka shprehur besimin e tij se deputeti Hasani do të jetë zë i fuqishëm për të drejtat e përgjithshme të shqiptarëve në Luginë të Preshevës si dhe për shqetësimet e atyre që jetojnë në Gjilan si të zhvendosur.

Azemi po ashtu ka shfaqur bindjen se do të trajtohet edhe problemi që ka të bëjë me amnistinë e përgjithshme të ish-ushtarëve të UÇPMB-së, duke sugjeruar që kjo çështje të ngritët si shqetësim i përgjithshëm dhe kjo kategori të mos kenë frikë në shekullin XXI që të shkojnë nëpër shtëpitë e tyre.

Në këtë debat janë diskutuar edhe shumë çështje të tjera, veçmas ato që kishin të bënin me efikasitetin e veprimeve të mëtejme, për të cilat u tha se duhet të konkretizohen me efekte të prekshme, pasi vet shpërndarja e popullit shqiptar në disa shtete, imponon nevojën për themelimin e një trupe të përbashkët, që do të avanconte proceset e përgjithshme, krahas zhvillimeve bashkëkohore.

Pjesëmarrësit, po ashtu kanë folur edhe nevojën e avancimit të bashkëpunimit në fushën e arsimit, kulturës dhe të tjera./rajonipress/