Haradinaj: S’isha i përfshirë në rastin ‘Kumanova’, akuzat janë shpifje ordinere

​Akuzat e Ministrit të Brendshëm të Maqedonisë se prapa ngjarjeve në Kumanovë, qëndron Ramush Haradinaj me njerëzit e tij, AAK i ka quajtur shpifje ordinere të elementëve kriminalë të Qeverisë së Shkupit.

“Haradinaj e askush nga njerëzit e tij, s’ka pasur asnjë lidhje as me Kumanovën e as me ngjarjet tjera të kësaj natyre, të cilat janë sponosorizuar nga vetë qarqet politike kriminale të Shkupit, kjo me qëllim të amistimit të veprimeve kriminale që i kanë ndërmarrë vet”, thuhet në komunikatën e AAK-së.

Kosova, sipas AAK-së, ka marrëdhënie të mira me Maqedoninë dhe është e interesuar të zhvilloje fqinjësi të mirë, por deklarata të tilla të pavërteta dhe nxitëse, janë në kundërshtim me fqinjinë e mirë.

“Prandaj Qeveria e Shkupit duhet të distancohet nga deklaratat e Ministrit të vet, sepse ajo e di më mirë se askush tjetër se kush qëndron prapa ngjarjeve në Kumanovë dhe zhvillimet atje, t’i emërtojë me emrin që kanë!”, thuhet më tej nga AAK, teksa i bëjnë thirrje edhe faktorit politik shqiptar në Maqedoni, që të distancohet nga shpifjet e Ministrit të Brendshëm Maqedonas, dhe të mos bëjë sehir, por ta zbardhin skenarin e Kumanovës dhe rolin që kishin në këto ngjarje segmentë kriminalë të pushtetit në Shkup./express/