Kadri Veseli në Anamoravë flet për kontributin e diasporës

Gjilan – Diaspora mund të shërbejë si motor i zhvillimit dhe hapjes së vendeve të punës duke sjellë investime, duke shtuar eksportet nëpërmjet konsumit të prodhimeve, duke u përpjekur për kthimin e trurit si dhe duke nxitur turizmit patriotik në Kosovë ka thënë Kadri Veseli në Gjilan.

Partia Demokratike e Kosovës, gjatë ditës së mërkurë mbajti takime me degët e saj në Gjilan, Kamenicë, Viti e në disa vende të tjera. Në këto takime, i pranishëm ishte pretendenti kryesor për kryetar të PDK-së, Kadri Veseli.

Veseli në takimin e Gjilanit ka folur në mënyrë të detajuar për rolin e diasporës duke qenë se ky rajon njihet për emigracion të lartë. “Ne i jemi mirënjohës mërgatës për kontributin vendimtar në të kaluarën, por unë besoj se ajo mund të luaj një rol të rëndësishëm edhe në të ardhmen e vendit. Diaspora mund të shërbejë si motor i zhvillimit dhe hapjes së vendeve të punës duke sjellë investime, duke shtuar eksportet nëpërmjet konsumit të prodhimeve, duke u përpjekur për kthimin e trurit si dhe duke nxitur turizmit patriotik në Kosovë” tha Veseli.

Veseli tha se nuk është edhe shumë problematike çështja se kush do të jetë Kryetar i PDK-së, sepse ky subjekt partiak ka një lidership të fortë.

Kadri Veseli ndërkaq ka treguar tërthorazi se kush mund të jetë edhe kryetar i Gjilanit, duke thënë se Zenun Pajaziti, do të jetë kandidati adekuat i PDK-së për zgjedhjet lokale në 2017./rajonipress/