Rrëfehet Albin Kurti – Flet për AAK-në dhe NISMA-n

Ish-udhëheqësi i Lëvizjes Vetëvendosje, Albin Kurti, ka folur rreth ndasive të fundit ndërmjet VV’së dhe partive të tjera opozitare në vend.

Aleanca për Ardhmërinë e Kosovës dhe Nisma për Kosovën kanë ndryshuar qëndrim rreth “vijave të kuqe” për koalicione, pas kritikave nga Lëvizja Vetëvendosje, ka thënë Kurti në emisionin “Tonight Ilva Tare” në Ora News.

Duke komentuar rreth qëndrimit të AAK’së dhe Nismës se janë “të hapur për koalicion parazgjedhor me forcat e tjera politike, me përjashtim të partive që aktualisht janë në pushtet”, Kurti ka thënë se ata “këtë e kanë bërë për shkak të kritikave që kemi thënë ne. Takimet tashmë kanë ndodhur. Deklaratat e tyre se për ta nuk ka vija të kuqe, tashmë kanë ndodhur”.

Sipas Kurtit, AAK dhe Nisma e përjashtojnë tash koalicionin parazgjedhor, që të mos e përjashtojnë atë paszgjedhor.

Ai ka thënë se ndasitë ndërmjet VV’së dhe AAK’së e Nismës e kanë zbehur aktivitetin opozitar.

“Ëshjtë e qartë se e kanë zbehur aktivitetin opozitar, ne kishim protesta shumë të fuqishme, aksione shumë të fuqishme”, ka thënë Kurti.