Çollaku: Votimi i sotëm kundër OSHP’së ndikon negativisht për vizat

Gjatë seancës së mbajtur në sot në Kuvend bordi i OPSH-së ( Organi i Pavarur Përzgjedhës), nuk arriti të marr votat e mjaftueshme për fillimin e procedurës së emërimit të anëtarëve të Organit Shqyrtues të Prokurimit Publik.

Ministri i Integrimeve Evropiane, Bekim Çollaku tha për Gazetën Express se emërimi i anëtarëve dhe funksionalizimi i Organit Shqyrtues të Prokurimit Publik ka qenë kriteri i fundit i mbetur në kuadër të procesit të liberalizimit të vizave.

“Me gjithë respektin dhe mirëkuptimin për pavarësinë dhe vullnetin e deputetëve për vendimmarrje sipas përcaktimit të tyre, dështimi për të funksionalizuar Organin Shqyrtues të Prokurimit Publik vetëm dy ditë para ardhjes së misionit vlerësues të ekspertëve të Bashkimit Evropian, rrezikon të ndikojë negativisht në raportin vlerësues të këtij misioni”, tha Çollaku.

Ministri Çollaku shpreson që ky kriter për liberalizimin e vizave të përmbushet sa më shpejt.