Kripa, fajtori kryesor për grumbullimin e dhjamit në stomak

Sasia tepër e madhe e natriumit ndryshon metabolizmin e posaçërisht ul mundësinë e shkrirjes së dhjamit në stomak

Natriumi i cili gjendet në kripën e kuzhinës është fajtori kryesor për grumbullimin e shtresave të dhjamit në stomak, thonë studiuesit. Në të vërtetë, një studim i kryer nga universiteti “Queen Mary” në Londër ka ardhur në përfundim se natriumi që gjendet në kripë grumbullon ujin në inde, duke vepruar në mënyrë kundërproduktive në vijën trupore. Sasia tepër e madhe e natriumit ndryshon metabolizmin e posaçërisht ul mundësinë e shkrirjes së dhjamit në stomak.

Nevoja ditore e kripës te personat e rritur është 1.4 gram, ndërsa sipas disa statistikave ne konsumojmë deri në katër herë më shumë kripë sesa që është e nevojshme. Mirëpo shtrohet pyetja pse konsumimi i sasisë së madhe të kripës ndikon në peshën tonë? Sipas këtij studimi, sasia e madhe e kripës në organizmin tonë ndikon që trupi të grumbullojë sasi të panevojshme të ujit në inde dhe kjo ndikon edhe në grumbullimin e yndyrës në pjesën e stomakut, transmeton Gazeta “Zëri”.

Por konsumimi i kripës mund të zvogëlohet me ndihmën e disa truqeve të thjeshta e sidomos me mënyrën e përgatitjes së ushqimeve. Për shembull, kur përgatisni perimet më mirë është t’i hidhni në skarë në vend se t’i zieni në ujë. Aroma e skarës shumë shpejt do t’u japë shije perimeve pa pasur nevojë për shtesë të kripës.