Pacolli nga Berlini flet për dalje nga ngërçi politik

Pacolli përmes një postimi në llogarinë e vet në “Facebook” ka dhënë shenja se ai mund t’i bashkohet koalicionit PAN në mënyrë që t’i jap fund ngërçit politik.

Presidenti i Aleancës Kosova e Re (AKR), Behgjet Pacolli, është duke qëndruar për vizitë në Berlin.

Pacolli përmes një postimi në llogarinë e vet në “Facebook” ka dhënë shenja se ai mund t’i bashkohet koalicionit PAN në mënyrë që t’i jap fund ngërçit politik.

Ai ka shkruar se Kosovës i nevojitet tani udhëheqësi gjithëpërfshirëse e cila do ta nxirrte atë nga ngërçi aktual politik. “Tani Gjermania është shembull i demokracisë dhe zhvillimit ekonomik, i mirëqenies dhe barazisë kulturore dhe sociale. Këtu njeriu ndihet si në shtëpinë e dytë të tij, siç thoshte shpeshherë presidenti Ibrahim Rugova. Në takimet intensive, këtu edhe njëherë kuptova qartë se çdokush në këto ditë të vështira që po kalon Kosova duhet të lenë anash interesat personale e partiake e të vepron konform interesave nacionale”, ka shkruar Pacolli.

Postimi i plotë i Behgjet Pacollit:

Miq të dashur, kurdo që vij në Berlin, në këtë vend mik, ndihem mirë, por edhe motivohem më shumë për punë dhe mirëqenie të vendit tim, Kosovës së dashur, këtu në vendin e mikut të madh të Kosovës, tani i ndjeri dhe legjenda e diplomacisë gjermane, Hans Dietrich-Genscher, ish shef i liberalëve gjerman, i cili kur ishte interesi i shtetit në pyetje, duke lënë anash interesin e partisë së tij vendoste konform interesave nacionale të shtetit të tij.
Ai së bashku me Helmut Kohlin e partisë tjetër, e shkruan historinë e re të Gjermanisë, të bashkimit kombëtar dhe shtetëror të tyre si komb, dhe atë e arritën me punë permanente dhe sakrifica të mëdha njerëzore dhe financiare, me bashkëpunim korrekt me partnerët e tyre perëndimorë në krye me ShBA-të, me Aleancën ushtarake Veri-atlantike dhe në komunikim intensiv me ish bashkimin sovjetik.
Tani Gjermania është shembull i demokracisë dhe zhvillimit ekonomik, i mirëqenies dhe barazisë kulturore dhe sociale. Këtu njeriu ndihet si në shtëpinë e dytë të tij, siç thoshte shpeshherë presidenti Ibrahim Rugova.
Në takimet intensive, këtu edhe njëherë kuptova qartë se çdokush në këto ditë të vështira që po kalon Kosova duhet të lenë anash interesat personale e partiake e të vepron konform interesave nacionale. Kosovës i nevojitet tani udhëheqësi gjithëpërfshirëse e cila do ta nxirrte atë nga ngërçi politik, sepse Kosova ka humbë mjaftë ekonomikisht dhe është dëmtuar shumë zhvillimi i saj për shkaqe të bllokadës politike e cila e ka kapluar vendin më shumë se dy muaj!
Mjerisht, një pjesë e shëndosh e rinisë tonë dhe e ekspertëve kanë ikur jashtë vendit për të kërkuar jetë më të mirë, dhe këtë nuk duhet ta lejojmë në asnjë mënyrë që të ndodhë në të ardhmen.
– Duhet të tregohemi të guximshëm në punë dhe veprime të shpejta për ta ndaluar menjëherë zbrazjen e Kosovës nga të rinjtë tanë.
– Duhet t’i ndihmojmë bizneset e vogla, të mesme si dhe t’i garantojmë investitorët e mëdhenj perëndimor për investime në Kosovë.
– Unë do bëjë çmos për t’ia kthyer emrin dhe imazhin e mirë shqiptarit, si dhe së bashku me njerëzit e punës dhe të dijes, do të bëjë krejt çka është e mundur dhe e nevojshme për të mirën e vendit tonë.
Kosova meriton më shumë dhe do bëjmë gjithçka për ta zhvilluar atë, duke i plotësuar aspiratat e atdhetarëve tanë që nuk kursyen asgjë nga jeta e tyre, që neve sot të jemi të lirë dhe shtet i pavarur..
Miqësisht ju përshëndes nga vendi ku demokracia nuk është vetëm shprehje gojore, por është sakrificë, punë, angazhim si dhe patriotizëm modern për çdo qytetarë, pa dallim!