Ministrja Hoxha flet për vizat dhe taksën, thotë se rrethanat janë të vështira të parashikohet çështja e liberalizimit

Ministrja e Integrimit, Dhurata Hoxha në një konferencë për media tha se nuk ka informacione zyrtare se çështja e pezullimit të taksës ka ndërlidhje me procesin e liberalizimit të vizave.

Hoxha në një konferencë për media tha se megjithëse në takimet që ka pasur në Poloni me ministrat e Ballkanit Perëndimor është përmendur kërkesa e heqjes së taksës, mirëpo se nuk i është komunikuar në mënyrë të drejtpërdrejtë.

“Nuk kemi informacione zyrtare se çështja e pezullimit të taksës është e ndërlidhur me liberalizimin e vizave…”, u shpreh ministrja.

E pyetur pse janë heshtur rreth procesit të liberalizimit të vizave, ajo tha “Nuk është çështje që jemi bërë më të heshtur, por po e shohim që rrethanat së paku para përfundimit të zgjedhjeve për Parlamentin Evropian nuk do të mund të arrijmë t’i parashikojmë çfarë do të ndodhë”.

Ministrja e Integrimit tha se do të shohin se cila do të jetë përbërja e re e PE-së. “Ne shpresojmë të fitojnë forcat më të moderuara politike, por edhe forcat politike ekstreme kanë një ngritje dhe kjo do t’i komplikojë pak gjërat…”, tha ministrja.

Duke u përgjigjur rreth deklaratave të saj për dhënien e datave për liberalizimin e vizave dhe mospërmbushjes së këtij premtimi, Hoxha tha “Po kam dhënë data për viza dhe do të vazhdojë të japë posa të mare data të reja. Këto data nuk i kam shpikur unë, por janë data që na janë komunikuar në takime. Por fatkeqësisht kjo nuk ndodhi, vendet anëtare të BE-së nuk morën vendim dhe ne po bëjmë çmos të kemi një momentum që liberalizmi i vizave të ndodhë sa më shpejt”.

Sipas saj, rrethanat janë të vështira të parashikohet çfarë mund të ndodh në të ardhmen e afër, duke i pasur parasysh zgjedhjet për Parlament Evropian dhe çështjen e BREX-it. /Telegrafi/