Konjufca: PAN-i po e bënë bllokadën me qëllim

Shefi i Grupit Parlamentar të Vetëvendosjes, Glauk Konjufca ka thënë se nuk ka fije dyshimi se cili është shkaku kryesor i mos themelimit të institucioneve të Kosovës, duke aluduar tek PAN-i.

“Ndodhemi në bllokadë për krijimin e institucioneve dhe për këtë duhet t’i adresojmë përgjegjësitë e plota dhe të diskutojmë se si të ecim përpara. Të gjithë e kanë kuptuar dhe s’ka fije dyshimi se cili është shkaku themelor për mosthemelimin e institucioneve. Arsyeja është mosprania e koalicionit që sipas kushtetueses do t’i takonte propozimi i emrit të kryeparlamentarit”, tha Konjufca.

Ai u ka bërë thirrje edhe një herë deputetëve të PAN-it që të vijnë në Kuvend, dhe siç u shpreh ai të mos bëhen shkaktarë të kësaj bllokade të cilën ata po e bëjnë me qëllim. /Telegrafi/

Nis tryeza e LAA-së dhe VV-së, kërkohet zgjidhje për zhbllokimin e institucioneve

Shefi i Grupit Parlamentar të LAA-së, Avdullah Hoti në hapjen e tryezës për të diskutuar rreth gjetjes së një zgjidhje për të dalë nga situata aktuale e krijuar pas zgjedhjeve të 11 qershorit, tha se që nga seanca e 3 gushtit kemi mbetur pa konstituimin e Kuvendit.

“PAN-i po kërkon që ne të pajtohemi që kryetari i Kuvendit dhe qeveria të votohen në një pako, e që është një vendim i çuditshëm. Këtë nuk e kemi pranuar as ne si LAA dhe as Vetëvendosje”, ka thënë Hoti.

Hoti ka theksuar se qëllimi i tryezës është që të gjejmë zgjidhje për zhbllokimin e institucioneve të vendit dhe që nga kjo tryezë të dalë një konsensus që të bëhen ndryshime kushtetuese./Telegrafi/