Konjufca: Për kryeparlamentarin bëjmë kompromise, për Qeverinë s’vjen në shprehje

Deputeti i Kuvendit të Kosovës, Glauk Konjufca, ka thënë se Lëvizja Vetëvendosje është për një kompromis për formimin e institucioneve të vendit. Ai ka thënë se kompromisi më i madh për VV’në është përzgjedhja e një kandidati tjetër nga koalicioni PAN për kreun e Kuvendit, dhe assesi kreu i Partisë Demokratike të Kosovës, Kadri Veseli.

Për Konjufcën, i papërshtatshëm është edhe Xhavit Haliti i PDK’së, meqë, sipas tij, ai bën pjesë në strukturën e njëjtë e cila, ka thënë ai, i ka bërë dëme të mëdha vendit.

Konjufca ka thënë se me Vetëvendosjen assesi nuk mund të diskutohet për formimin e Qeverisë nga koalicioni PAN.

“Kryetari i Kuvendit mund edhe të diskutohet deri diku, por për Qeverinë kjo as nuk vjen në shprehje. Do të ishte banale dhe qesharake si kërkesë”, ka thënë Konjufca në RTV Dukagjini.