Eide: Prishtina e Beogradi të arrijnë marrëveshje tani, ngecja është shumë e rrezikshme

Ish-emisari i Organizatës së Kombeve të Bashkuara për Kosovën, Kai Eide, ka thënë sot se ngecja në dialogun Kosovë-Serbi është e papranueshme dhe se një zgjidhje mes palëve duhet të gjendet tani.

“Një zgjidhje ndërmjet Kosovës dhe Serbisë për të stabilizuar raportet duhet të gjendet tani, për të krijuar stabilitet në rajon dhe përfshirje në organizatat ndërkombëtare”, ka shkruar Eide në rrjetin social Twitter, në internet.

“Hapat e tjerë që pengojnë marrëdhëniet mes palëve duhet shmangur”, ka këshilluar ai.

“Bisedimet duhet të fillojnë. Ngecja e vazhdueshme politike është shumë e rrezikshme”, ka përfunduar ai.

Shkrimi i Eides i ka pëlqyer presidentit të vendit, Hashim Thaçi, i cili te diplomati ka gjetur një aleat në përpjekjet e tij për të arritur një marrëveshje me Serbinë, që nënkupton ndryshimin e kufijve.

Thaçi e ka falënderuar ish-diplomatin norvegjez për përkrahjen e dhënë.