“Boka Club” terrorizon banorët e lagjes “Fidanishta”, komuna heshtë?

Gjilan – Banorët e lagjes “Fidanishta” janë në hallë të madh nga zhurma e tepërt që sjell veprimtaria e klubit “Boca Club”. Banorët i kanë shkruar disa here Lutfi Hazirit dhe organeve tjera komunale, por ata thonë se ky klub ka lidhje të forta.

Banorët e lagjes “Fidanishta” i kanë bërë një kërkesë publike Lutfi Hazirit dhe drejtorisë për zhvillim ekonomik e policisë së Kosovës që ta ndalojë veprimtarinë e klubit “Boka Club”.

Sipas banorëve ky klub e zhvillon veprimtarinë në kundërshtim me rregulloren për fillimin dhe mbarimin e orarit të punës të subjekteve afariste në territorin e komunës së Gjilanit.

Sipas banorëve klubi i natës “Boka Club” po i shqetëson ata për çka urgjentisht komuna duhet të ndalojë veprimtarinë e saj. “Jeta e banorëve në lagjen “Fidanishta” gjegjësisht në rrugën “Marie Shllaku” është vështirësuar dukshëm si pasojë e zhurmës që vije nga brendësia e klubit, dehjet në vend publik, vozitjet e rrezikshme, vandalizëm, zënia e rrugës dhe parkingjeve private dhe sjelljeve të pahijshme dhe ekspozimeve të turpshme dhe ofenduese nga konsumatorët që frekuentojnë në këtë klub nate” thuhet në kërkesën e banorëve.

Banorët kanë shkruar se çdo natë ata terrorizohen ngjashëm nga veprimtaria e këtij klubi të natës. “Fëmijëve tanë i mohohet gjumi dhe pushimi natën, duke ndikuar keq në rritjen dhe rezultatin e tyre në shkollë si pasojë e pagjumësisë dhe mos pushimit të mjaftueshëm si pasojë e këtij klubit dhe efekteve negative që sjell ai.

Banorët kanë përmendur edhe disa arsye tjera të rëndësishme dhe kanë kërkuar nga Lutfi Haziri dhe policia e Kosovës që të veprojë urgjentisht./rajonipress/