Presidenti Thaçi i tregon diplomates evropiane për “hapat e mëdhenj” që ka bërë Kosova

Presidenti Hashim Thaçi priti sot në takim Sekretaren e Përgjithshme të Shërbimit Evropian, Helga Schmid, me të cilën bisedoi për të arriturat dhe reformat që, sipas Thaçit, kanë ndodhur në Kosovë.

Thaçi përmendi mbarëvajtjen e zgjedhjeve, si procesin e fundit që ndodhi në vend, e që ishin të rregullta.

“Zgjedhjet e suksesshme komunale dhe betimi i gjyqtarëve dhe prokurorëve nga komunitetet joshumicë janë hapat më të fundit të mëdhenj të Kosovës”, ka thënë Presidenti Thaçi.

“Po vazhdojmë me sukses reformat në politikë, sundim të ligjit e ekonomi, që sa më shpejt të lëvizim, me hapa konkretë, drejt Bashkimit Evropian”, u shpreh Presidenti.

Duke folur për Kosovën në rajon, Presidenti u shpreh se Kosova ka ndërtuar marrëdhënie të mira fqinjësore me të gjithë dhe shtoi se dialogu në mes Kosovës dhe Serbisë duhet të shërbejë për ndërtimin e marrëdhënieve të mira fqinjësore dhe pajtim në mes dy shteteve.

“Dialogu duhet të kthehet në proces për pajtim, miqësi dhe bashkëpunim të mirë ndërfqinjësor në mes të Kosovës dhe Serbisë”, vijoi ai.

Sekretarja e Përgjithshme Schmid u shpreh se BE-ja mbetet e përkushtuar për pranimin e Ballkanit Perëndimor në gjirin e saj dhe ftoi që të intensifikohen përpjekjet për reforma në të gjithë sektorët.