Haziri uron të gjithë nxënësit dhe mësimdhënësit për vitin e ri shkollor

Gjilan – Kryetari i Komunës së Gjilanit, Lutfi Haziri, me rastin e fillimit të vitit të ri shkollor ka uruar të gjithë nxënësit dhe mësimdhënësit për vitin e ri shkollor duke shprehur bindjen se në Gjilan çdo vit do të ketë vetëm ngritje të cilësisë së arsimit dhe të kushteve më të mira për punë dhe mësim.

“Është dita e parë e mësimit për këtë vit shkollor. Është viti i parë i shkollimit për fëmijët të cilët janë ulur në bankat e shkollës për të nisur mësimin e shkronjave si hapa të parë të arsimimit dhe edukimit. Si prioriteti i parë që është arsimi në programin tim qeverisës, gjithnjë jam angazhuar për kushte më të mira, për mbështetje të fuqishme dhe për cilësi. Po punojmë bashkërisht që Gjilani të jetë edhe më tutje elitë sa i përket arsimimit dhe sukseseve në cilësinë e mësimit”, ka thënë ai.

Më tej kryetari Haziri ka bërë të ditur se investimet në arsim do të jenë të vazhdueshme, sepse sipas tij vetëm me standarde të lartë në arsim, mund të kemi zhvillim të qëndrueshëm ekonomik, çka më së shumti i duhet Kosovës.
“Kuadrot e Kosovës duhet të jenë lojale me ato në vendet më të zhvilluara. Vetëm me ngritje të cilësisë në arsim mund të kemi suksese dhe zhvillim të qëndrueshëm ekonomik. Gjilani ka kapacitete, ka mundësi dhe punon që kuadrot që dalin nga kjo komunë të jenë konkurruese të fuqishme në tregun e punës kudo në Europë dhe gjetiu. Urime dhe qoftë i mbarë për të gjithë ky vit shkollor”, ka shtuar kryetari Haziri./rajonipress/