Sadiku afër Kombëtares, Alushi në dyshim

Vazhdon edhe më tej të ‘kosovarizohet’ Kombëtarja e Shqipërisë. Emri më i ri në listën e trajnerit italian, Gianni de Biassi dhe Federatën Shqiptare të Futbollit (FSHF) është mbrojtësi prishtinas, Loret Sadiku, që luan te skuadra, Helsingborg, në Suedi. Sadiku është zbuluar pikërisht nga menaxheri i Kombëtares, Alban Bushi i cili ishte i pranishëm në ndeshjen mes Helsingborgut dhe Gelfes, ku Sadiku kishte shkëlqyer në qendër të mbrojtjes.

Ish-sulmuesi i ‘kuqezinjëve’ ka mbetur mjaft i kënaqur me performancën e mbrojtësit 21-vjeçar dhe është shprehur i gatshëm për ta pajisur me pasaportën shqiptare. Pas ndeshjes që është përcjellë nga Bushi, ky i fundit ka pasur një bisedë më mbrojtësin kosovar, ku i ka folur për projektin e Kombëtares, ndërsa ka marrë një përgjigje pozitive nga mbrojtësi, për ta veshur fanellën ‘kuqezi’.

Lojtari ka pasaportë suedeze dhe ka pasur tri paraqitje deri më tani për shtetin skandinav, me përfaqësuesen U-21. Pritet që gjatë ditëve të ardhshme të nisin procedurat për ta pajisur me pasaportë shqiptare lojtarin. Sadiku përveçse në qendër të mbrojtjes, është i aftë të luajë mjaft mirë edhe si mesfushor shkatërrues.(Tribuna)