Engel: Edhe një konfirmim se Kosova është e pavarur, sovrane dhe e lirë

Ligjvënësi amerikan, Eliot L. Engel, demokrati më i lartë në Komisionin e Punëve të Jashtme në Dhomën e Përfaqësuesve lëshoi deklaratën e mëposhtme në lidhje me marrëveshjen e arritur sot për normalizimin e marrëdhënieve mes Kosovës dhe Serbisë.

“Unë përgëzoj Kosovën dhe Serbinë për arritjen e kësaj marrëveshjeje historike. Në veçanti, do të doja të vlerësoja kryeministrin Thaçi për guximin dhe gatishmërinë e tij për të marrë vendime të vështira dhe kryeministrin Daçiç për pragmatizmin e tij dhe vizionin për të ecur përpara. Angazhimi personal i Shefes së Politikës së Jashtme të BE-së, Catherine Ashton, ka qenë kritik për këtë marrëveshje historike. Marrëveshja dërgon një sinjal të qartë shprese për një rajon që kërkon t’i jap fund konfliktit dhe se popujt e tyre duan të jetojnë në paqe dhe prosperitet në Bashkimin Evropian. Ky është edhe një tjetër konfirmim i faktit se Kosova është e pavarur, sovrane dhe e lirë”, ka thënë Engel, i cili shton se shtetet e BE-së që nuk e kanë njohur Kosovën – Qiproja, Greqia, Rumania, Sllovakia dhe Spanja – tani duhet të afirmojnë sovranitetin e Kosovës.

“Dështimi i tyre për të njohur Kosovën jo vetëm do të vonojë përparimin e vendit në BE, por edhe atë të Serbisë. Dialogu synon të sigurojë një të ardhme të begatë, për të dy popujt e Kosovës dhe Serbisë. Sot u dha një sinjal i qartë se e ardhmja e Ballkanit mund të jetë e ndritshme, por ka ende shumë punë për t’u bërë përpara”. /Telegrafi/