PDK po mendon për zgjedhje të jashtëzakonshme

Qytetarët e Kosovës shumë shpejt mund të ftohen që të dalin në zgjedhje të jashtëzakonshme parlamentare. Ideja për mbajtjen e zgjedhjeve të parakohshme tashmë ka filluar të diskutohet në Partinë Demokratike të Kosovës e cila udhëheqë me Qeverinë.

Zyrtarë të lartë të PDK-së që janë në Qeveri kanë diskutuar ditëve të fundit për këtë ide dhe besojnë se nëse nuk arrihet marrëveshja mes Kosovës dhe Serbisë vendi duhet t’i mbajë zgjedhjet e parakohshme këtë vit, meqë një kërkesë e tillë mbështetet edhe nga partitë opozitare në Kosovë të cilat këto zgjedhje i kanë kërkuar qysh vitin e kaluar.

Refuzimin e marrëveshjes në Bruksel nga ana e Serbisë, partia e kryeministrit Hashim Thaçi e sheh si një “kapital” të saj që të futet në zgjedhje “si triumfuese që nuk pranoi koncesione për veriun e Kosovës”, ka treguar me kusht anonimiteti një zyrtarë i lartë i PDK-së. “Dështimi për arritjen e marrëveshjes mes Kosovës dhe Serbisë në Bruksel në këtë muaj është armë e fortë për partinë tonë”, ka thënë zyrtari i lartë i PDK-së.(Tribuna)