Haziri: Vizita e Thaçit në Gjilan për të kamufluar depresionin politik

Gjilan – Lutfi Haziri kryetar i LDK-së në Gjilan dhe deputet në Parlamentin e Kosovës tha të shtunën se vizita e Hashim Thaçit në Gjilan nuk ka për qëllim sjelljen e investimeve e as për të realizuar nevojat e qytetarëve të saj, por janë vizita që kanë synim kamuflimin e depresionit politik e financiar që e ka shkaktuar vet kryeministri dhe udhëheqja e saj komunale, duke e zhytur Gjilanin në borxhe përmes premtimeve elektorale.

Kreu i LDK-së në Gjilan Lutfi Haziri të shtunën në një takim me mediet ka akuzuar Hashim Thaçin se po shfrytëzon dhe po i keqpërdor vizitat e tij në Gjilan. “Vizita e Thaçit në Gjilan vetëm ka kamufluar depresionin politik dhe financiar që e ka përfshirë këtë komunë e cila realisht është zhytur në borxhe edhe përmes premtimeve elektorale” tha Haziri.

Haziri tha se Universiteti i Gjilanit dhe zvarritja e tij po bëhet për të pritur zgjedhjet.”Ky është një projekt që ka nisur në vitin 2008 dhe është projekt i përbashkët PDK-LDK dhe bashkë edhe duhet të kryhet. Por vonesa për ta funksionalizuar atë po shihet se ka motiv kryesor zgjedhjet sepse në komunat e tjera Universitetet janë hapur dhe janë duke punuar normalisht”.

Haziri e ka kritikuar Thaçin edhe rreth emërimit të këtij Universiteti ende pa lindur.”Emërimi nuk mund të bëhet nga kryeministri sepse janë profesorët, intelektualët, por edhe mekanizmat ligjor që e rregullojnë këtë çështje” shtoj Haziri.

Ndërkaq Haziri ka folur edhe për projektin e lumit “Mirusha”. “Ky projekt madhor për Gjilanin është shndërruar në një “Urë të shenjtë” sepse mjetet e Mirushës po manipulohen dhe projekti po deformohet meqë janë ndërruar punëkryesit. Ky projekt megjithatë duhet të ketë mbështetjen e qëndrueshme buxhetore dhe punët të kryhen me dinamikën e paraparë” tha Haziri.

Haziri ka kritikuar Thaçin edhe për premtimin e korsive në drejtimet Gjilan – Prishtinë dhe Gjilan – Ferizaj. “Këto premtime janë më shumë elektorale sepse korsit dhe zgjerimi i tyre askund nuk është i paraparë me kornizën buxhetore”. Sipas Hazirit edhe rruga Gjilan – Ferizaj – Dheu i Bardhë që mendohet të lidhë Anamoravën me Durrësin dhe Shkupin është pak e shfrytëzueshme për qytetarët e këtij regjioni.

“Gjilani dhe Anamorava është përjashtuar padrejtësisht nga ky projekt dhe nga aksi i këtyre korridoreve. Ky është një diskriminim i llojit të vet sepse Anamorava po anashkalohet e bashkë me këtë edhe Kosova Lindore. Mos harroni se porta “Dheu i Bardhë” është vendi më i frekuentuar në Kosovë, ndërsa Anamorava fatkeqësisht ende ka një infrastrukturë të viteve 1970-ta.

Haziri ka përmendur edhe borxhet që ka qeveria lokale mbi 3 milion euro.”Borxhet e Komunës së Gjilanit nuk mund të fshihen me SMS sepse ato janë të shumta. Shumë rrugë ende nuk janë kryer derisa shumë kompani nuk i kanë marrë mjetet e tyre, kurse janë premtuar shumë subvencione. Edhe angazhimi për të kryer punë konsulente prej 170 mijë eurove është një kosto e pa arsyetueshme që i kushton shumë Gjilanit” tha Haziri./rajonipress/