Liderët duan president nga Kuvendi

Partitë parlamentare për dallim nga takimi i javës së kaluar, të premten nuk kanë arritur pajtime për asnjë pike lidhur me ndryshimet në ligjin për zgjedhjet.

Në takimin që është kryesuar nga kreu i AAK-së, Ramush Haradinaj, është arritur pajtueshmëri vetëm për mandatin shtesë që komisioni parlamentar duhet të marrë. Haradinaj ka bërë të ditur se në takim është prekur, tema e zgjedhjes së presidentit, vendet e rezervuara për komunitetet, çështja e KQZ-së por edhe postet e deputetëve për malazezët dhe kroatët. Sa i përket zgjedhjes së presidentit, sipas Haradinajt, shumica e partive janë që kjo procedurë të mbetet e njëjtë.

“Ne jemi të hapur që zgjedhja e presidentit të bëhet në Kuvend”, ka thënë Haradinaj. Lidhur me ulëset për kroatët e malazezët, Haradinaj ka thënë se partitë nuk janë shprehur kundër, por për detaje ka mbetur që të vendoset në takimet e ardhshme.

Kryetari i AAK-së ka pranuar se dialogu në Bruksel po ndikon në procesin e reformës zgjedhor. “Nuk ka ndikim direkt, por mund të them se e prek çështjen e ulëseve të rezervuara. Neve na intereson edhe përfaqësimi i serbëve të veriut, ta zëmë, por nuk kishim pas dëshirë me qenë në dëm të serbëve të pjesës qendrore”, ka deklaruar Haradinaj (Tribuna).