Japin dorëheqje pjesa dërmuese e bordit të KVRL

Gjilan – Në mbledhjen e thirrur nga anëtarët e bordit të Këshillit të Veprimit Rinor Lokal të Gjilanit, është diskutuar gjendja e rëndë e punës së KVRL-së në Komunën e Gjilanit. Në këtë mbledhje ku ishin të pranishëm 12 përfaqësues të këtij institucioni, tetë nga ta dorëzuan dorëheqjen.

Dorëheqja u dorëzua nga shtatë anëtarë të bordit: Mejdi Sadiku , Genc Mustafa, Admir Daku, Arben Toska, Durim Rexhepi, Betim Sherifi dhe Mehmet Zylfiu. Dorëheqjen e dorëzoi gjithashtu edhe nënkryetarja e KVRL-së, Albesa Aliu.

Arsyet e dorëheqjes së tyre të cilat u diskutuan në mbledhje dhe u dorëzuan të bashkangjitura në fletëdorëheqje ishin: mungesa e bashkëpunimit, transparencës, aktiviteteve, koordinimit, centralizimit të institucionit dhe mungesa e përfaqësimit dinjitoz nga përfaqësuesja zyrtare e këtij institucioni.

Gjatë mbledhjes anëtarët e bordit kanë vlerësuar se mungesa e të gjitha këtyre elementeve, ka bërë që ky institucion të jetë pasiv dhe të mos funksionoj siç duhet.

Po ashtu, njëra nga arsyet shumë me rëndësi është implikimi i Kryetarit të Këshillit Qendror të Veprimit Rinor (KQVR), në të gjitha çështjet që ndikojnë në pasivizimin dhe centralizmin e këtij organizimi thuhet në një njoftim të dërguar nga Mejdi Sadiku./rajonipress/