Strategjia dalëse

Behgjet Pacolli po shqyrton mundësinë e daljes nga Qeveria, në mënyrë që nga pozicioni opozitar ta përgatisë partinë e tij për zgjedhjet e ardhshme. Këto lëvizje të Zëvendëskryeministrit vijnë pasi Hashim Thaçi nuk po duket shumë i interesuar për ta mbyllur çështjen e riformatimit të Qeverisë.

Kërkesa e Behgjet Pacollit për të riformatizuar Qeverinë e Kosovës nuk është përfillur nga Lideri i PDK’së, Hashim Thaçi.

Duket se dinamika e Pacollit nuk po përshtatet me atë të Thaçit.

Pacolli kishte thënë se ndryshimet në Qeveri do të ndodhin më së largu javën që shkoi, ndërsa ndërrimet e ministrave nuk pritet të ndodhin as këtë javë.

Në këtë situatë, Pacollit i kanë mbetur pak mundësi për të manovruar në Qeverinë e Kosovës.

Burime të Express kanë treguar se Lideri i AKR’së po e shqyrton mundësinë për të dalë nga koalicioni për shkak se kërkesat e tij asnjëherë nuk po merren parasysh nga Kryeministri Thaçi.

“Deri më tash, Pacolli e ka dëgjuar Liderin e PDK’së për të gjitha kërkesat që i ka pasur në raport me Qeverinë. Por, e kundërta ka ndodhur me kërkesat e Pacollit drejtuar Thaçit”, ka thënë një zyrtar i AKR’së, që ka folur për Express.