Berisha: Bashkimi kombëtarë është vendimtar

Kryeministri i Shqipërisë, Sali Berisha ka theksuar se akti i heqjes së monumentit të heronjve të kombit shqiptar të Luginës së Preshevës, është dëshmi tjetër e albanofobisë që sundon politiken zyrtare te Beogradit ndaj shqiptareve.

“Ky akt dëshmon dhe një herë se bashkimi i kombit shqiptar është vendimtar për të ardhmen e tij, por dhe për çlirimin e fqinjëve tanë nga albanofobia dhe pasiguria qe ndiejnë ata qe kane pushtuar trojet e shqiptareve dhe shërbehen me praktika raciste dhe fobie ndaj tyre”, ka shkruar Berisha në faqen e tij në Facebook.

“Duke iu shprehur mbështetjen e plote qytetareve dhe udhëheqësve politike te Preshevës, serish u bej thirrje te shmangin provokimet, të ruajnë gjakftohtësinë ndaj terrorit policesk te Beogradit dhe i garantoj se Shqipëria do bëj gjithçka në të gjitha institucionet ndërkombëtare për t’i dhënë fund terrorit policor ndaj shqiptareve qe jetojnë në trojet e tyre etnike në Luginën e Preshevës. Ata që shkulen monumentin e heronjve te Preshevës duhet ta dine se: Të rënët tanë nuk vdesin kurrë!”, ka theksuar Berisha.