Cana: Do të rikthehemi

Lorik Cana thotë se skuadra e tij, Lazio nuk e ka merituar humbjen që e pësoi të enjten në Romë nga Ludogorec me rezultat 0:1, në kuadër të Ligës së Evropës.

Kapiteni i Shqipërisë ka thënë se ekipi i tij ishte dëmtuar nga gjyqtarët, por beson se Lazio do ta përmbys disavantazhin në ndeshjen kthyese që do ta zhvillojë në Bullgari.

“Ishim të vetëdijshëm se kundërshtarët janë të shpejt e të rrezikshëm me kundërsulme. Atyre u dha një penalti, e cila nga fusha dukej se nuk ekzistoi, pasi dora ishte e ngjitur në trup. Por, duhet ta harrojmë humbjen, sepse kemi potencial për ta kthyer rezultatin në favor tonin”, ka deklaruar Cana për mediat italiane.