Haradinaj: Rruga më e mirë për ushtrinë e Kosovës janë ndryshimet kushtetuese

Kryetari i Komisionit për Punë të Brendshme, Siguri dhe Mbikëqyrjen e Forcës së Sigurisë së Kosovës, Daut Haradinaj në debatin për FSK-në dhe transformimin e saj në ushtri, tha se duhet të pritet që kjo të bëhet me ndryshime kushtetuese, por se duhet që aleatët e Kosovës t’i bëjnë presion Listës Serbe që t’i votojë këto ndryshime.

“Ne i jemi mirënjohës NATO-s që për shumë vite ka ofruar paqe dhe stabilitet në Kosovë. Pasi janë krijuar disa kushtet, mendoj që edhe Kosova ka marrë një iniciative pak më serioze siç është transformimi i FSK-së. Gatishmëria e listës serbe për ndryshime kushtetute s’ka qenë e mjaftueshme, ka deputet serb të gatshëm me votu transformimin e FSK-së. FSK në këto rrethana ka dhjetëra oficer e nënoficer serb, FSK në asnjë variant s’ka qëllim diskriminues. Rruga më e mirë dhe e vetme për ta bërë ushtrinë është përmes ndryshimeve kushtetuese”, ka thënë Haradinaj, transmeton lajmi.net.

Sipas tij, Kosova nuk ka asnjë arsye me u ngut, por të bëhen ndryshime kushtetuese me partneret tanë dhe listën sere.

“Procesi i transformimit merr 10 vjet. E mira është që të ndërrohet Kushtetuta”, tha ai.

Këto komente Haradinaj i bëri në tryezën me temën “Çka të bëjë Parlamenti për FSK-në?” të organizuar nga SPRC në bashkëpunim me Friedrich Ebert Stiftung (FES) dhe Komisionin Parlamentar për Punë të Brendshme, Siguri dhe Mbikëqyrjen e Forcës së Sigurisë së Kosovës.