LDK s’ka ndëshkime për humbësit

Humbja e disa komunave në zgjedhjet lokale të 2009, kishte shtyrë kryesinë e Lidhjes Demokratike të Kosovës që në një nga mbledhjet e saj pas përfundimit të këtyre zgjedhjeve, të marrë vendim për ndëshkimin e kandidatëve të saj për kryetar të komunave në të cilat kishte humbur. Ndëshkimi ishte që humbësit e zgjedhjeve mos të kenë më mundësi rikandidimi për kryetarë komunash nga kjo parti.

Mirëpo kjo praktikë nuk pritet të ndodhë edhe pas përfundimit të zgjedhjeve lokale të 3 nëntorit, në të cilat LDK riktheu qeverisjen në disa komuna të rëndësishme, mirëpo humbi komunën me të madhe në vend, Prishtinën, e që për kandidat kishte vetë kryetarin e kësaj partie, Isa Mustafën. Drejtues të LDK-së vlerësojnë se ka vend për shumë analiza, mirëpo jo edhe për ndëshkime, pasi, sipas tyre, në këto zgjedhje LDK ka dalë fituese.

Nënkryetarja e LDK-së, Teuta Sahatçija, ka thënë se LDK do t’i bëjë analizat në lidhje me zgjedhjet e fundit lokale, për të parë se çfarë ka ndikuar në rezultatet pozitive dhe çka në rezultatet negative. “LDK e ka mbajtur mbledhjen e Kryesisë, ndërsa sot (e hënë) ka organizuar mbledhje edhe me kryetarë të degëve, ku është bërë analizë primare dhe është dhënë besimi për udhëheqjen e partisë dhe vazhdimin e reformave të cilat i ka nisur kryetari Isa Mustafa dhe struktura e LDK-së”, ka thënë Sahatçija…(Tribuna).