“Shota” me bord drejtues drejt normalizimit

Është bërë gati një vit e gjysmë që kur Ministria e Kulturës e ka lënë pa organe drejtuese Ansamblin Shtetëror të Këngëve dhe Valleve “Shota”. Në maj të vitit të kaluar, MKRS-ja kishte shkarkuar nga detyra drejtorin e “Shotës”, koreografin Dilaver Kryeziu, kjo pas denoncimit të valltarëve se ai kishte vendosur kamera të fshehta në zhveshtoret e objektit.

Që nga ajo kohë ky ansambël është duke u drejtuar nga ushtruesi i detyrës së drejtorit, Ismet Bogujevci. Po ashtu, ky institucion nuk ka as këshill drejtues, ndërkohë që Ligji për të është miratuar nga Kuvendi i Kosovës në prill të këtij viti. Bogujevci ka deklaruar se e mërkura do të jetë hera e parë kur bordi i ri drejtues i “Shotës” do të mblidhet, e i cili sipas procedurave do të shpallë konkursin për drejtor.

“Nesër do të mblidhet bordi zyrtarisht në takimin e parë dhe sigurisht se do ta shpallin konkursin për drejtor”, ka pohuar Bogujevci. Këtë e ka konfirmuar edhe shefi i kabinetit të ministrit të Kulturës, Shkelzen Dragaj. “Këshilli i Ansamblit ‘Shota’ do të konstituohet nesër. Besojmë që një nga vendimet e para të Këshillit do të jetë shpallja e konkursit për drejtor të përgjithshëm dhe artistik”, është shprehur Dragaj…(Tribuna).