“Murale shpirti” libri më i ri me poezi i Sabit Rrustemit

Gjilan – Sabit Rrustemi i ka shtuar edhe një vepër tjetër opusit të tij krijues. “Murale shpirti”, e cila sapo ka dalë nga botimi, është vepra e 15-të e poetit Sabit Rrustemi, që vjen si një depërtim edhe më i thellë artistik i tij në botën shpirtërore.

Në njëqind poezitë e librit “Murale shpirti” poeti shpalos pritje dhe arritje, si mesazh për të shpëtuar të bukurën e shpirtit, të cilën ai e shpërfaq si askush tjetër në të vargjet e tij.

Rrustemi si krijues me një përvojë 35-vjeçare, është fitues i dhjetëra konkurseve anonime letrare në Kosovë si dhe orëve letrare, të organizuara në trevat e ndryshme shqiptare. Së fundi në Gjakovë, në maj 2013, në Mitingun Ndërkombëtar të Poezisë, libri i tij “Në fytyrën e një gjethi” u shpërblye si libri më i mirë i botuar ndërmjet dy manifestimeve. Përmbledhjen e parë të poezive e botoi në vitin 1990, me titull “Ku i la lisat era”. “Murale shpirti” është vepra e tij e radhës. /rajonipress/