Zbutet historia!

Autorët e teksteve shkollore, kanë refuzuar 80% të kërkesave të Komisionit për rishikimin e teksteve shkollore, që të bëhen korrigjimet e librave të historisë nga klasa e pestë deri në klasën e 13-të. Autorët thonë se nuk e kanë pranuar asnjë vërejtje, që ka qenë me motive politike. Kurse përfaqësuesit e komisionit për korrigjime, thonë se me autorët e teksteve janë pajtuar që të hiqen disa fjalë fyese, siç është fjala “Hordhi”, e që kjo fjalë është korrigjuar me fjalën “Pushtim i dhunshëm”, edhe fjala “Regjim i egër”, është korrigjuar si “Pushtim i dhunshëm”, si dhe janë përmirësuar disa data të ndryshme.

Frashër Demaj, drejtor i Institutit të Historisë së Kosovës, dhe autor i teksteve shkollore, thotë se në tekstet shkollore të historisë, nuk është më asnjë fjalë fyese. Dhe se është tërësisht liri akademike e autorit, fjalori që ai e përdor për të sqaruar ngjarjet historike.

“Ministria e Arsimit, e askush nuk mund të krijojë robotë prej shkencëtaresh, dhe të shkruajë çka i pëlqen qoftë ministrisë, qoftë dikujt tjetër”, ka thënë Demaj. Ai thotë se tendenca kryesore ka qenë që të hiqet prej teksteve shkollore të historisë, fjala pushtim. Por këtë gjë, Demaj thotë se nuk do ta pranojnë asnjëherë…(Tribuna).