Shqipëria vazhdon të llogarit në Januzajn

Kombëtarja e Shqipërisë vazhdon të shpresojë se Adnan Januzaj do të pranojë t’i mbroj ngjyrat e saj, pavarësisht faktit që babai i 18 vjeçarit ka lënë shumë pak shpresa gjallë, në shenjë pakënaqësie me politikat e Federatës Shqiptare të Futbollit (FSHF).

Madje, përzgjedhësi i skuadrës shqiptare, Gianni De Biasi, vazhdon të insistojë në mesfushorin e talentuar të Manchester Unitedit, i cili me ngulm po kërkohet edhe nga Belgjika e Anglia, por edhe disa shtete tjera. Strategu italian shpreson se Januzajn do ta ketë në dispozicion qysh në eliminatoret për Kampionatin Evropian, i cili do të mbahet në Francë në vitin 2016.

“Do të punoj në bashkëpunim me Federatën, duke e pasur të qartë në kokë sesi do të mund ta motivojë këtë djalosh për të luajtur me Shqipërinë. Sigurisht që do ta bëjë një tentativë për ta bindur që të luajë me ne. Nuk e di sesa do të mund të jem i suksesshëm në këto përpjekje, por sigurisht që do ta takojmë Januzajn”, ka deklaruar De Biasi.