Sherri i pasaportës, Nuhiu larg kombëtares

Ngecin procedurat për pajisjen me pasaportë shqiptare të sulmuesit kosovar Atdhe Nuhiu. Burime të “Panorama Sport” brenda FSHF-së tregojnë se për momentin është e pamundur që 24-vjeçari të bëhet pjesë e Kombëtares.

Pas negociatave me drejtuesit e institucionit të futbollit shqiptar, Nuhiu ishte dakord që të luante për kuqezinjtë, mirëpo tashmë problem për sulmuesin janë bërë austriakët. Sipas ligjeve të këtij shteti, nuk lejohet mbajtja e dy nënshtetësive.

Në këto kushte, nëse Nuhiu do të pajiset edhe me pasaportë shqiptare, atëherë ai duhet të heqë dorë nga ajo austriake.

Ky variant nuk i intereson aspak futbollistit kosovar, pasi ai dhe familja e tij kanë ndërtuar jetën në Austri. Nuhiu ka lajmëruar pak ditë më parë FSHF-në për këtë ngërç, gjithsesi shpresat për aktivizimin e tij me përfaqësuesen shqiptare ende nuk janë shuar.

Por, gjatë javëve të fundit mësohet se lojtari ka pasur konsultime me juristë të njohur, si e si të gjejnë një mënyrë e cila do t’i hapte rrugën e aktivizimit te Kombëtarja shqiptare, por sigurisht pa prekur interesat e tij në Austri.

Për sulmuesin me origjinë nga Prishtina është gjetur një zgjidhje, por duket se këtë herë kjo nuk i intereson shumë FSHF-së.

Të njëjtat burime tregojnë se futbollisti mund të përfitojë nga një vakum ligjor i shtetit austriak, që e lejon atë për mbajtjen e dy nënshtetësive për një periudhë 1- vjeçare.

Mirëpo, pasi të kalojë kjo kohë, Nuhiu duhet të zgjedhë më pas vetëm një nga nënshtetësitë. Ky variant, edhe pse nuk është ai i duhuri, gjithsesi po shikohet me interes nga FSHF-ja.

Mësohet se do të kërkohet të përfitohet nga vakumi ligjor, vetëm e vetëm që lojtari të ketë mundësi të luajë me Shqipërinë./express/