Nacionalistët i bëjnë presion Januzajt: Pranoje Shqipërinë

Talenti shqiptar i Manchester Unitedit, Adnan Januzaj, ka marrë mesazhe nga shqiptarët nacionalistë në rrjetet sociale që të luajë për Kombëtaren e tyre, shkruan tabloidi britanik, Daily Star.

“18-vjeçari ka të drejtë ta përfaqësojë Belgjikën, Shqipërinë, Serbinë dhe Turqinë për shkak të prejardhjes së tij të përzier. Ai deri më tash ka refuzuar ftesat nga Federata Belge e Futbollit, ndërsa tani nacionalistët shqiptarë po përpiqen ta bindin përmes rrjeteve sociale”, shkruan ky tabloid, në edicionin e veçantë të së dielës.

“Ti ke gjak shqiptari, mos harro”, përmendet një postim në Facebook.

Gjithashtu, një postim tjetër ia përkujton atij heroin kombëtar, Skënderbeun, i cili luftoi kundër turqve për çlirimin e trojeve shqiptare.

Sipas Daily Star, ai duhet të vendosë nëse do të luajë për Belgjikën në Kampionatin Botëror ‘Brazili 2014’ ose të rrezikojë që të mos marrë pjesë kurrë në një turne të madh duke e përfaqësuar Shqipërinë.