Mavraj në dyshim, Azemi kthehet kundër Bochumit

Mbrojtësi kosovar, Mërgim Mavraj, ka pak gjasa që të luajë kundër ish-skuadrës së tij, Bochumit, në fundjavë. Kështu ka bërë të ditur të enjten trajneri i Greuther Furthit, Frank Kramer për “nordbayern.de”.

Ndërkohë sulmuesi kosovar Ilir Azemi pritet të aktivizohet në këtë ndeshje që zhvillohet të dielën në kuadër të xhiros së shtatë në Bundesliga 2 të Gjermanisë. Mavraj e Azemi i munguan në ndeshjen e xhiros së gjashtë që Greuther Furthi barazoi ndaj Frankfurtit me rezultatin 1:1.

Pos kësaj ndeshje Mavraj i mungoi edhe kombëtares së Shqipërisë për ndeshjen me Slloveninë e Islandën. “Mërgimi është duke u përmirësuar. Po bën vrapime dhe nëse nuk ka probleme, atëherë do të nisë edhe stërvitjet bashkë me ekipin. Ndoshta mund të aktivizohet në fund të javës. Mirëpo, do të jetë goxha e vështirë”, ka thënë Kramer.