Mehmedi rikthehet në sulmin e Freiburg-ut

Sulmuesi shqiptar nga Gostivari i Maqedonisë, Admir Mehmedi, ka vuajtur dënimin prej një ndeshje moslojë për Freiburgun, dhe të shtunën i gatshëm e prêt takimin kundër Augsburgut si mysafirë, i vlefshëm për javën e pestë të Bundesligës gjermane.

“Unë vetëm një ndeshje isha i suspenduar dhe tani kam të drejtë loje. Jam i përgatitur dhe i gatshëm për të ndihmuar skuadrën time të re drejtë një fitore në kampionatin e Gjermanisë në futboll. Këtë javë luajmë si mysafir me Augsburgun, ku gjithsesi na prêt një lojë e vështirë, por unë kam besim se do të fitojmë”, është shprehur për Lajm, sulmuesi i ri Freiburgut, Admir Mehmedi.

Kujtojmë se, Mehmedi ishte ndëshkuar me karton të kuq në ndeshjen e xhiros së tretë të Bundesligës, në të cilën skuadra e tij barazoi në udhëtim ndaj Hoffenheimit me rezultatin 3:3. Ai ishte inkuadruar në lojë në minutën e 72-të, ndërsa u përjashtua me karton të kuq në minutën e 91-të pas një gjesti ndaj gjyqtarit anësor.

Sulmuesi 22-vjeçar te Freiburgu është huazuar nga Dynamo Kievi gjatë kësaj vere. Mehmedi është pjesë e përfaqësueses së Zvicrës. Në renditjen tabelore Freiburgi është i 16-ti me vetëm 2 pikë nga katër ndeshje.