Cana: Jemi të zhgënjyer, e kishim lojën në dorë

Lorik Cana ndihet mjaft i zhgënjyer pas humbjes që e pësoi Kombëtarja shqiptare nga Sllovenia me rezultat minimal 1-0, në ndeshjen kualifikuese për Botërorin 2014, e cila u zhvillua sonte në Lubjanë.

Kuqezinjtë kishin më shumë nga loja, duke krijuar disa raste të qindpërqindta. Por, në fund trepikëshit iu gëzuan sllovenët, falë një goli të shënuar në pjesën e parë, edhe pse nuk patën raste tjera të mira.

“Ne lojtarët dhe të gjithë shqiptarët jemi të zhgënjyer. U pa se në çfarë mënyrë humbëm. U pa se çka dha ekipi në fushë, kjo është një humbje që vështirë kapërdihet. Ky është futbolli: një skuadër jep më shumë, mundohet më shumë dhe prodhon më shumë dhe në fund nuk fiton”, deklaroi fillimisht kapiteni shqiptar.

“Ata e shënuar një gol fantastik dhe ndoshta ishte njëri nga dy mundësitë që kishin. Por, ne e kishim lojën në dorë, krijuam rast pas rasti dhe i bëmë presion kundërshtarit, duke i luajtur të gjitha shanset tona, me një mentalitet fituesi. Por, të gjitha përpjekjet tona nuk u shpërblyen. E donim një rezultat të mirë për njerëzit që na mbështetën në stadium”, vazhdoi futbollisti i Lazios.

Sidoqoftë, ai e përgëzoi ekipin e Gianni De Biasit për lojën që e bëri, pasi mendon se Kuqezinjtë po tregojnë ecuri dhe vazhdimësi.

Përkundër humbjes, mbrojtësi gjakovar beson ende në kualifikim në Botëror. “Gjasat janë të shumta për kualifikim. Edhe para ndeshjet me Sllovenisë, e dinim se edhe nëse nuk fitojmë këtu, mund të shkojmë në Botëror. Por, duhet pranuar se kjo humbje na lë peng. Në grupin tonë, çdo rezultat është i mundshëm. Ne jemi të gjithë afër me njëri tjetrin”, vijoi ai.

Ish futbollisti i PSG-së, Marseilles, Sunderlandit e Galatasarayt thekson se pas katër ditësh, ai me shokë do të luajnë ndaj një kundërshtari me kualitete, siç është Islanda, por shton se gjithçka është e mundur.

Cana beson se nëse vazhdohet me të njëjtin mentalitet, ekipit të Shqipërisë do t’i shpërblehet i gjithë mundi.