Ja çfarë kërkoi Isa Mustafa nga Arben Gashi dhe të tjerët!

Duket se deklaratat e dhëna para disa ditësh nga deputeti Arben Gashi dhe nga anëtari i Kryesisë, Lutfi Haziri, që LDK-së, duhet t’i takoj posti i kryeministrit, kanë nxitur liderin e Lidhjes Demokratike të Kosovës, Isa Mustafa që të ftoj një takim për të premten me deputetët e kësaj partie.

“Në këtë mbledhje Isa Mustafa ka kërkuar nga deputetët e Lidhjes Demokratike të Kosovës që të jenë të kujdesshëm me deklaratat e tyre”, ka thënë për Gazetën Blic një deputet që i ka qenë i pranishëm në këtë mbledhje.

“Kryetari ka kërkuar nga deputetët që të mos japin deklarata në opinionin në lidhje me zhvillimet e fundit, sidomos në lidhje me koalicionin LVAN. Kjo kërkesë e tij më tepër ka qenë një lutje”, ka thënë ky deputet.

Mirëpo, zyrtarisht askush nga kjo parti nuk kanë dhënë shumë detaje se çka u bisedua saktësisht në këtë takim.

Deputetja e LDK-së, Alma Lama e kontaktuar nga Gazeta Blic nuk ka dhënë shumë komente rreth asaj se çka është biseduar në takimin e djeshëm të liderit Isa Mustafa me deputetët.

“Nuk kam çka të komentoj. Krejt çka është biseduar në takim, është thënë në kumtesën e lëshuar për medie”, ka thënë ajo për Gazetën Blic.

Ndërkaq, deputeti tjetër, Arben Gashi u ka thënë medieve të premten se në këtë takim nuk është biseduar për punën e postit të kryeministrit.

LDK-ja pas takimit të djeshëm, e kishte lëshuar një kumtesë për medie, ku ndër të tjera thuhet se kjo parti është shumë unike.

“Në këtë takim u bisedua lidhur me përgatitjet për vijimin e seancës konstituive të Kuvendit të Kosovës. Ky grup konfirmoi gatishmërinë për të vijuar punën përgatitore për seancën, si dhe qëndrimin unik për të vijuar projektin e shumicës parlamentare, me qëllim që institucionet e reja të krijohen sa më parë.
Grupi i deputetëve të Lidhjes Demokratike të Kosovës shpreh vendosmërinë për të implementuar vullnetin politik dhe përfaqësues të shumicës parlamentare në Kuvendin e Kosovës, e cila është përfaqëson shumicën e qytetarëve të Kosovës”, thuhet në kumtesën e lëshuar për medie nga LDK-ja gjatë ditës së premte.

Arben Gashi, ishte ndër të parët i cili kërkoi që të rishqyrtohet marrëveshja e LAN-it. Ai pati një propozim që Isa Mustafa të marrë postin e kryeministrit, ndërkaq, Ramush Haradinaj e Albin Kurti, të jenë zëvendëskryeministra.

Idenë e tij e mbështeti edhe Lutfi Haziri. Derisa deputeti tjetër i LDK-së, Armend Zemaj edhe njëherë e qartësoi se ai nuk do të votoj për Ramush Haradinajn kryeministër.

Edhe deputetja, Alma Lama kishte dhënë një ide, se si të ndahen postet ndërmjet LVAN-it.

Ajo kishte deklaruar se dy vjet postin e kryeministrit duhet ta marrë Isa Mustafa, e dy të tjera Ramush Haradinaj. /Gazeta Blic/