Zgjedhjet do të shfrytëzohen në KS, si sukses

Pavarësisht sfidave që ka para vetes, por edhe pengesave në zbatim të disa vendimeve që tashmë është dashur të zbatohen, Kosova do mundohet të paraqitet në Këshill të Sigurimit të OKB-së, si një vend stabil që dëshmon se është e përcaktuar në rrugën integruese në BE dhe në NATO. Zyrtarët qeveritarë nuk i pengon raporti i Clint Williamsonit, mosthemelimi i Gjykatës Speciale, e as arrestimet masive nën akuzat për terrorizëm, që të deklarohen se gjendja aktuale në vend është më e mira që ka qenë ndonjëherë.

Sot (e premte) kur edhe pritet të diskutohet raporti i rregullt për Kosovën i Sekretarit të Përgjithshëm të OKB-së Ban Ki Moon në Këshill të Sigurimit, zv/ministri në detyrë i Punëve të Jashtme Petrit Selimi, për Tribunën ka thënë se sukses i këtij viti për vendin janë mbajtja e zgjedhjeve në tërë territorin e Kosovës.

“Gjendja aktuale në Kosovë është më e mira që nga fillimi i raporteve të OKB-së më 1999. Kosova ka kaluar një rrugë të gjatë nga vendi post-konfliktuoz në republikë evropiane me perspektivë të qartë të anëtarësimit në BE. Besoj se edhe OKB do të reflektojë në sukseset e këtij viti siç janë organizmi i zgjedhjeve kombëtare dhe pjesëmarrja e serbëve në veri në integrim të vendit”, ka thënë Selimi…(Tribuna).