Prljaskaj: Kroacia, e hapur ndaj shqiptarëve

Deputetja shqiptare në parlamentin e Kroacisë, Ermina Lekaj Prljaskaj, në intervistën dhënë për “Zërin” konfirmon gatishmërinë e shtetit kroat që ta përkrahë Kosovën.

Punësimi i shqiptarëve në institucionet shtetërore, hapja e Institutit Albanologjik në Zagreb, bashkëpunimi më i ngushtë me shtetin amë, marrja e fuqisë punëtore nga Kosova, ruajtja e identitetit dhe njëkohësisht integrimi i tyre në shoqërinë kroate, janë çështjet për të cilat premton zgjidhje deputetja shqiptare në parlamentin e Kroacisë, Ermina Lekaj Prljaskaj.

Në Kroaci ku numri i shqiptarëve është rreth 18.000 dhe shumica prej tyre janë nga Kosova dhe Maqedonia, Prljaskaj thotë në një intervistë për “Zërin” se pret që komuniteti shqiptar në institucionet kroate të përfaqësohet më mirë në zgjedhjet lokale, pas të cilave ajo pretendon se do të ndryshojë situata dhe, sipas saj, shqiptarët do të kenë mundësi të kenë përfaqësues në qeverinë lokale. Prljaskaj vlerëson se shteti kroat ndaj Kosovës çdo herë ka qenë shtet mik dhe është i gatshëm që ta përkrahë ende Kosovën.