Kombëtarja e Kosovës përballet me atë të Brazilit më 18 nëntor?

Federata e Futbollit të Kosovës (FFK), është duke u angazhuar maksimalisht që të arrijë marrëveshje me Brazilin për zhvillimin e miqësores me përfaqësuesen tonë. Zëdhënësi i FFK-së, Fazli Berisha i ka thënë KosovaPress-it se FFK është duke e negociuar mundësinë e zhvillimit të një ndeshje miqësore me Brazilin, një nga kombëtaret më të forta në botë.

“Kryetari i FFK-së Fadil Vokrri bashkë me menaxherin për zhvillimin e ndeshjeve miqësore është duke e negociuar mundësinë për zhvillimin e ndeshjes miqësore me Brazilin. Është duke u biseduar për të gjitha detajet dhe mendoj se brenda pak ditësh do të vendoset nëse do të arrihet marrëveshja me Brazilin”, ka thënë Berisha.

Sipas tij, miqësorja me Brazilin, e cila ka koston e lartë, do të luhet në Kosovë më 18 nëntor. Berisha shpreson se do të realizohet kjo miqësore, e që sipas tij, për futbollin, por edhe për shtetin tonë do të ishte një promovim i mirë në rrafshin ndërkombëtar.

Në rast se do të realizohet kjo miqësore, atëherë Brazili do të jetë kombëtarja më e fortë që do të sfidojë përfaqësuesen me të re në botë, pasi që në skuadrën brazilian militojnë yjet botërorë.