32 gjoba për mosvendosje të rripit të sigurisë në Gjilan gjatë aksionit ROADPOL

Gjilan – Drejtoria Rajonale e Policisë në Gjilan ka intensifikuar kontrollet në trafik në kuadër të planit operativ ROADPOL, me fokus të veçantë në përdorimin e rripit të sigurisë nga pjesëmarrësit në komunikacion.

Sipas njoftimit të policisë, gjatë 24 orëve të fundit zyrtarët policorë kanë shqiptuar gjithsej 32 gjoba ndaj drejtuesve dhe pasagjerëve të automjeteve që nuk kanë përdorur rripin e sigurisë gjatë lëvizjes.

Policia rikujton se, bazuar në Ligjin për rregullat në trafikun rrugor, në automjetet për udhëtarë dhe në mjetet transportuese shoferi dhe të gjithë personat që gjenden në mjet janë të obliguar të përdorin rripin e sigurisë. Përdorimi i tij konsiderohet një nga masat më të rëndësishme për mbrojtjen e jetës, pasi në rast përplasjeje pengon që personi të hidhet nga automjeti dhe ul ndjeshëm pasojat e mundshme.

Gjithashtu, autoritetet theksojnë se në rast se një person i mitur që transportohet në automjet nuk e përdor rripin e sigurisë, përgjegjësia bie mbi shoferin, i cili dënohet me 200 euro gjobë, ndalim të drejtimit të mjetit për tre muaj dhe dy pikë negative.

Ndërkaq, për mosvendosjen e rripit të sigurisë nga personat që gjenden në automjet gjatë lëvizjes parashihet gjobë prej 150 euro.

Policia e Gjilanit ka bërë të ditur se kontrollet në trafik do të vazhdojnë edhe në ditët në vijim në kuadër të operacionit ROADPOL, me qëllim të rritjes së sigurisë dhe parandalimit të aksidenteve në rrugë./rajonipress/