18 vjet burg për shqiptarin që vrau babë e birë
RajoniPress
07:48, 30 Qershor, 2012
Trupi gjykues i Gjykatës së Flawilit ka shkuar një hap më largë se akuza, e cila kishte kërkuar 15 vjet heqje lirie për vrasësin
Vrasja para katër vitesh e dy shqiptarëve në Wil (SG) ka marrë dje epilogun e saj gjyqësor. Shqiptarit 51 vjeçar, i cili në maj të vitit 2008 kishte qëlluar për vdekje babë e bir, 53 dhe 18 vjeçarë, i është caktuar dënimi me 18 vjet burg për vrasje të dyfishtë.
Duke shqiptuar këtë dënim, trupi gjykues i Gjykatës së Flawilit ka shkuar një hap më largë se akuza, e cila kishte kërkuar 15 vjet heqje lirie për vrasësin.
Njëri vëllai të vrasësit i është shqiptuar dënimi me kusht prej 11 muajsh. Po ashtu një vëlla tjetër dhe një djalë i të dënuarit kryesor, kanë marrë dënime nga 8 muaj me kusht për pjesëmarrje në rrahje.
22 vjeçari, të cilit në zënkën e përgjakshme i janë vrarë babai dhe vëllai, megjithëse akuzohej për pjesëmarrje në rrahje, u shpall i lirë.
Shpallja e dënimit në ndërtesën e Gjykatës së Flawilit është bërë nën masa të rrepta sigurie.
Siç është shkruar tashmë, në mesin e dy familjeve të armiqësuara, kishte për një kohë të konsidrueshme kercënime, sharje dhe rrahje. Ndërsa më 3 maj 2008 konflikti kulmoi me vrasjen e dyfishtë që ndodhi në një rrugë qendrore të qytetit Wil.
Fillimisht pjesëtarë të dy familjeve po rriheshin me shkopinj. Ndërsa i dënuari kryesor që kishte ardhur më vonë, kishte nxjerrë revolen dhe i kishte qëlluar nga afërsia e drejtpërdrejtë në kokë dhe në qafë, duke vrarë kështu dy veta, babë e bir, të familjes kundërshtare.
Kryetari i trupit gjykues e ka quajtur “ekzekutim publik” këtë vrasje të kryer para djalit tjetër të të vrarit. Me këtë veprim është plotësuar figura e veprës penale të vrasjes së rëndë.
Por, dënimi i shqiptuar ende nuk ka marrë formën e plotëfuqishme.
Nga ana tjetër, avokati i vrasësit ka kërkuar një dënim jo më të lartë se 8 vjet për klientin e tij. Ai ka thënë se dorasi nuk e kishte planifikuar vrasjen por vetëm kishte dashur të ndihmonte vëllanë dhe djalin që ishin përfshirë në konflikt. Ai kishte pleduar se bëhej fjalë për veprën penale vrasje me qëllim.(albinfo.ch)
