15 të rinj fillojnë praktikë në Komunën e Kamenicës

Kamenicë – Drejtori i Zhvillimit Ekonomik dhe Diasporës, Edon Dërmaku, së bashku me zyrtaren nga kjo drejtori, Qëndresa Kastrati, kanë pritur në një takim 15 praktikantë, të cilët kanë nënshkruar marrëveshjen e tyre për fillimin e praktikës profesionale në sektorë të ndryshëm të Komunës së Kamenicës.

Ky angazhim realizohet në bazë të Memorandumit të bashkëpunimit ndërmjet Komunës së Kamenicës, Ministrisë së Financave, Punës dhe Transfereve, UNICEF në Kosovë si dhe Odës Ekonomike Gjermano-Kosovare, me qëllim të ofrimit të mundësive për zhvillim profesional dhe përfitim të përvojës praktike për të rinjtë.

Praktikantët do të angazhohen në fusha të ndryshme, si administratë, infermieri, menaxhment dhe ekonomi, si dhe në sektorin juridik, duke kontribuar njëkohësisht në përmirësimin e shërbimeve komunale dhe duke fituar përvojë të vlefshme në institucionet publike.

Me këtë rast drejtori Dërmaku u uroi mirëseardhje praktikantëve dhe i inkurajoi ata që ta shfrytëzojnë këtë mundësi në mënyrën më të mirë të mundshme.

“Ky program i praktikës është një mundësi shumë e mirë për të rinjtë që të fitojnë përvojë konkrete pune dhe të zhvillojnë aftësitë e tyre profesionale. Komuna e Kamenicës mbetet e përkushtuar që të mbështesë të rinjtë në rrugëtimin e tyre drejt tregut të punës,” theksoi drejtori Dërmaku./rajonipress/