11 vjeçari: Ishte më lehtë se të bëja detyrat e shtëpisë

Vogëlushi britanik 11 vjeçar, që arriti të futej në një aeroplan pa biletë dhe pa pasaportë dhe të fluturonte për në Romë, ka deklaruar se ishte më e lehtë se të bënte detyrat e shtëpisë.

Liam Corcoran i shpëtoi mamasë së tij, mori autobusin, shkoi në aeroport dhe mori avionin për në Romë.
“Nuk kisha asgjë me vete dhe askush nuk më kërkoi ndonjë gjë,” tha ai.

Liam, që ka probleme me të mësuarin, po kërkonte një banjo dhe eci deri sa përfundoi në aeroplanin Jet2. Ai hyri në banjo dhe mbeti aty, derisa avioni u ngrit në qiell.
Kur ishin mbi Francë, pasagjerët e kuptuan se kishin marrë një fëmijë gabimisht me vete.

Por nuk ktheheshin dot pas dhe u ulën në Romë, ku policia e mori në pyetje fëmijën.

Babai i Liam thotë se nuk arrin ta besojë se askush në aeroport nuk pyeti se çfarë bënte një fëmijë i pashoqëruar aty.
Kjo thyerje e sigurisë në aeroportin e Mançesterit ka shkaktuar shumë pikëpyetje në lidhje me sigurinë e kufijve në Britani pak orë përpara nisjes së Lojërave Olimpike./Indeksonline/