​Haradinaj: AAK në mënyrë kolektive do ta ndihmojë “Fondin e Sigurisë”

Kryetari i AAK-së Ramush Haradinaj ka bërë të ditur se ka marrë sot pëlqimin e anëtarëve të Këshillit Drejtues dhe Kryesisë së AAK që kolektivisht ta ndihmojnë Fondin e Sigurisë së Kosovës.

“E konsiderojmë obligim e detyrë që ta ndihmojmë këtë Fond, i cili është ndihmesë për shtetin dhe për sigurinë nacionale e rajonale”, ka shkruar Haradinaj në një postim në Facebook.

Ndryshe, Qeveria e Kosovës, në përputhje me nevojat e Forcave të Sigurisë së Kosovës, situatës aktuale dhe pas konsultimeve me partnerët ndërkombëtarë, dje ka themeluar Fondin e Sigurisë.

Mjetet e mbledhura finannciare synohet të përdoren në përputhje me strategjinë e sigurisë shtetërore që pritet të miratohet nga Qeveria e Kosovës.

Funksionimi i këtij fondi rregullohet me akte përkatëse procedurale dhe do të përdoret ekskluzivisht për qëllimin e përcaktuar nga qeveria. Në përputhje me legjislacionin në fuqi do të zbatohen procedurat për prejardhjen e mjeteve financiare me qëllim të ruajtjes së integritetit të fondit dhe qëllimit të tij.