Zyrtari i ATK-së akuzohet për marrje ryshfeti

Gjilan – Prokuroria Themelore në Gjilan, Departamenti për krime të rënda ka ngritur aktakuzë kundër Ibrahim Kqikut inspektor tatimor në ATK dhe Nazmi Hamdiut kontabilist në firmën “Idea” për veprën penale “marrje ryshfeti” dhe “ndihmë në marrjen e ryshfetit”.

Departamenti për krime të rënda në Prokurorinë Themelore në Gjilan ka ngritur aktakuzë kundër inspektorit tatimor të Kosovës (ATK) në Gjilan, Ibrahim Kqikut për veprën penale “marrje ryshfeti” dhe kundër Nazmi Hamdiut pronar i zyrës së kontabilitetit “Idea” për veprën penale “ndihmë në marrjen e ryshfetit”, raporton rajonipress.

Sipas aktakuzës që e ka ngritur prokurori i rastit Agron Uka, Ibrahim Kqiku dyshohet se më 10 dhjetor 2013 afër stacionit të autobusëve në Gjilan në zyrën e kontabilitetit “Idea”, pronë e të pandehurit Nazmi Hamdiu, i pandehuri Ibrahim Kqiku në cilësinë e personit zyrtar- inspektor i ATK-së, në cilësi të personit zyrtar, në mënyrë të tërthortë ka kërkuar dhe pranon përfitim për vete duke pranuar dhuratë për përfitim në mënyrë që i njëjti duke vepruar në kundërshtim me detyrat e tij zyrtare ka marrë 2.000 euro, më qëllim që të dëmtuarit Lulzim Ibrahimi t`ia mundësojë barazimin e stoqeve të kompanisë “Ceramika Creativa”, ashtu që pas bastisjes nga ana e policisë së Kosovës, paratë i gjenden në xhepin e majtë.

Edhe për të pandehurin e dytë Nazmi Hamdiu aktakuza saktëson se ai me dashje ka ndihmuar personin zyrtar të dyshuarin Ibrahim Kqiku. Hamdiu i ka thënë të dëmtuarit Lulzim Bajrami në telefon “sjelli të hollat se nuk janë rëndë me i pru” thuhet në aktakuzë.

Në këtë gjykim prokuroria ka siguruar prova, incizime, kamerat dhe të hollat./rajonipress/