Zyrtare: Amir Rrahmani do të mungojë deri në tri javë pas lëndimit të pësuar në ndeshjen ndaj Moldavisë

Viti 2020 nuk ishte aspak me fat për Kosovën. “Dardanët” u përballën me shumë mungesa për shkak të lëndimeve dhe situatës me COVID-19 gjatë gjithë vitit.

Natyrisht, kjo i kishte edhe pasojat e veta pasi skuadra që drejtohet nga Bernard Challandes regjistroi rezultate negative derisa e humbi edhe mundësinë e kualifikimit në “Euro 2020”, raporton “Zeri.info”.

Përfaqësuesja e Kosovës e zhvilloi ndeshjen e fundit për këtë vit të mërkurën (18 nëntor) në stadiumin “Fadil Vokrri” në Prishtinë, kundër Moldavisë.

Kjo ishte ndeshja e fundit e “Dardanëve” në grupin C3 të Ligës së Kombeve, derisa Kosova e fitoi me rezultat minimal, 1:0.

Mbrojtësi i Kosovës, Amir Rrahmani pësoi një lëndim në fillim të kësaj ndeshje, me ç’rast u detyrua të largohet nga fusha e lojës, ani pse në fillim tentoi ta vazhdonte ndeshjen.

“Zeri.info” e ka kontaktuar ndihmëstrajnerin e Kosovës, Muharrem Sahiti për ta pyetur në lidhje me shkallën e lëndimit të Rrahmanit.

Sahiti i cili e drejtoi Kosovën në ndeshjet e nëntorit shkaku i mungesës së Bernard Challandes, tha se lëndimi i Rrahmanit është mjaft specifik.

“Amir Rrahmani pritet të mungojë deri në tri javë pas lëndimit të pësuar në ndeshjen ndaj Moldavisë”, ka deklaruar Muharrem Sahiti.

“Lëndimi i tij është specifik. Ai tentoi ta vazhdonte lojën, por ishte e pamundur”, tha të premten për “Zeri.info” Sahiti. /Zeri.info /