Zvicër: I vërtetohet dënimi me 20 vjet burg shqiptarit

Pasi që Gjykata Federale pati anuluar dënimin me burg të përjetshëm, Gjykata e kantonit të Vaudit në nëntorin e kaluar ia kishte shqiptuar atij dënimin me 20 vjet burg.

Ankesën e tretë të tij e ka hedhur poshtë Gjykata FederaleNjë shqiptar i cili në viti 2008 në bashkëveprim me një zviceran, kishte mbytur një pensionist në Epalinges të kantonit Vaud, duhet të mbajë përfundimisht dënimin prej 20 vitesh burg.

Këtë vendim e ka marrë Gjykata Federale e Zvicrës, duke vërtetuar kështu vendimin që më parë e kishte marrë gjyqësia e kantonit, transmeton albinfo.

Dorasi atëbotë 27 vjeçar bashkë me shokun e tij pesë vjet më të ri në dhjetor të vitit 2008 kishin hyrë në vilën e një çifti pensionistësh. Kur i kishte befasuar i zoti i shtëpisë, ata e kishin rrëzuar atë duke e goditur me shqelma dhe grushte.

Ishte keqtrajtuar edhe bashkëshortja e tij, e cila ua kishte dhënë çelësin e trezorit. Të inatosur se aty kishin gjetur vetëm 200 euro, ata i ishin kthyer sërish pensionistit duke e goditur me grushte e shqelma në kokë. Kur kishte ardhur policia, e kishte gjetur pronarin e vilës të vdekur nga gjakderdhja në tru.

Gjyqet që deri më tash e kanë trajtuar këtë rast, në vitin 2010 i kanë shpallur fajtor dy dorasit për plaçkitje dhe vrasje të rëndë. Për këto vepra, shqiptarit ia kanë shqiptuar një dënim të përjetshëm ndërsa zviceranit dënim me 16 vjet heqje lirie. Pas ankesës së bërë në Gjykatën Federale, kjo e fundit është përgjigjur se dënimi me burg të përjetshëm nuk ka qenë sa duhet i arsyetuar. Dhe, pasi që Gjykata e Kantonit të Vaudit e ka sjellë në rigjykim lëndën ka ardhur në përfundimin e njëjtë: burgim të përjetshëm.

Reagimi i Gjykatës Federale ka qenë sërish në favor të shqiptarit. Ajo ka vendosur se, pranë një dënimi prej 16 vitesh burg të shqiptuar për bashkëfajtorin zviceran, edhe shqiptari duhet të dënohet me një masë burgu të kufizuar në kohë (jo të përjetshëm). Duke ndjekur këtë vendim të instancës superiore, Gjykata e kantonit të Vaudit në nëntorin e kaluar ia kishte shqiptuar atij dënimin me 20 vjet burg. Së fundi, ankesa e tretë e të dënuarit është hedhur poshtë nga Gjykata Federale.