Zjarrfikësit e Vitisë pajisen me teknologji moderne për operacione shpëtimi, rriten kapacitetet për intervenim në aksidente

Viti – Njësia Profesionale e Zjarrfikësve dhe Shpëtimit në Viti ka avancuar kapacitetet e saj operative me pajisje të reja dhe moderne për intervenim në aksidente të komunikacionit rrugor dhe situata të tjera emergjente. Lajmi është bërë i ditur nga Hetem Jakupi, i cili ka njoftuar se furnizimi është realizuar më 9 nëntor 2026, përmes Depo-së së Agjencisë së Menaxhimit të Emergjencave (AME).

Pajisjet e reja përfshijnë mjete hidraulike të kombinuara me bateri, të dedikuara për prerjen dhe zgjerimin e pjesëve të automjeteve të dëmtuara, duke mundësuar nxjerrjen më të sigurt të personave të bllokuar. Në mesin e pajisjeve të pranuara janë edhe shufra cilindrike shpëtimi me bateri, për ngritjen dhe zhvendosjen e elementeve të rënda, pajisje për menaxhimin e xhamave të automjeteve, si dhe sisteme mbrojtëse të timonit, të cilat ndihmojnë në ruajtjen e sigurisë së personave të lënduar gjatë operacioneve të nxjerrjes.

Ky furnizim përfaqëson një zhvillim të rëndësishëm në modernizimin e shërbimit të zjarrfikësve dhe shpëtimit në Viti, duke krijuar kushte më të mira për reagim profesional, intervenim më efikas dhe menaxhim më të sigurt të situatave me rrezikshmëri të lartë.

Sipas Jakupit, pajisjet e reja nuk përfaqësojnë vetëm një avancim teknik të njësisë, por mbi të gjitha një investim të drejtpërdrejtë në sigurinë publike dhe mbrojtjen e jetës së qytetarëve.

Ai ka shprehur mirënjohje ndaj Agjencisë së Menaxhimit të Emergjencave për mbështetjen dhe kontributin në fuqizimin e kapaciteteve të kësaj njësie, duke theksuar se profesionalizmi, gatishmëria dhe pajisjet bashkëkohore janë elemente të domosdoshme për përballimin e sfidave emergjente.

Në një shërbim ku sekondat mund të përcaktojnë fatin e një jete, pajisjet moderne dhe gatishmëria profesionale nuk janë thjesht mjete pune, por instrumente vendimtare në misionin human të shpëtimit të jetës së njeriut./rajonipress/