Zjarrfikësit e Qairit vizitojnë Kamenicën

Kamenicë – Një delegacion i Shoqatës së Zjarrfikësve “Bajram Miftari” nga Qairi i Shkupit ka vizituar Komunën e Kamenicës për të përcjellë nga afër ushtrimin e organizuar nga Drejtoria për Mbrojtje dhe Shpëtim.

Pas takimeve me zjarrfikësit e Kamenicës, ata u pritën edhe në komunë nga nënkryetari Fatmir Matoshi, së bashku me Drejtorin e Mbrojtjes dhe Shpëtimit Faik Rexhepaj dhe stafin e kësaj drejtorie.

Nuredin Mustafa nga kjo shoqatë ka thënë se zjarrfikësit e Qairit ndjejnë kënaqësi të veçantë që vizitojnë Kamenicën dhe shkëmbejnë përvoja me kolegët e tyre. “Ushtrimi i sotëm tregoi profesionalizmin e zjarrfikësve të Kamenicës dhe institucioneve tjera të përfshira në këtë ushtrim, dhe ne mësuam gjera pozitive këtu” tha Nuredin Mustafa.

Nënkryetari Fatmir Matoshi i ka falënderuar zjarrfikësit nga Qairi, edhe në emër të kryetarit Begzad Sinani për vizitën dhe punën që e bëjnë. “Është mision dhe profesion fisnik puna e zjarrfikësve, jeni në mbrojtje të jetëve dhe pasurisë së qytetarëve të komunave ku jeni duke punuar. Sado që bëjnë institucionet e larta vendimmarrëse për ju prapë është e pakët në krahasim me punën dhe dedikim që keni për të shpëtuar jetëra njerëzish. Bashkëpunimi Juaj me zjarrfikësit e Kamenicës është për t`u përshëndetur dhe ne si komunë do të bëjmë gjithçka është e nevojshme që ju të shkëmbeni përvoja dhe vizita edhe në të ardhmen për të qenë sa më profesional në punën tuaj” tha nënkryetari Matoshi.

Përfaqësuesit e Shoqatës së Zjarrfikësve “Bajram Miftari” i dhuruan nënkryetarit të Komunës një uniformë verore të kësaj shoqate./rajonipress/